Detyrimi i “grave të komfortit” (gra të detyruara në skllavëri seksuale për ushtarët japonezë) përbën një krim të rëndë të kryer nga militarizmi japonez e një shkelje të rëndë të të drejtave të viktimave, dhe për këtë ka prova të pakundërshtueshme që nuk mund të mohohen. Kështu u shpreh të mërkurën në një konferencë të rregullt për shtypin zëdhënësi i Ministrisë së Jashtme të Kinës, Lin Jian, duke shtuar që komuniteti ndërkombëtar ka shprehur indinjatë të thellë ndaj këtij krimi historik.

Foto nga Ministria e Jashtme e Kinës

Sipas raportimeve, Grupi i Punës për Diskriminimin ndaj Grave dhe Vajzave pranë Këshillit të të Drejtave të Njeriut të OKB-së, së bashku me disa mekanizma të tjerë të posaçëm të të drejtave të njeriut, i kanë dërguar një letër akuzuese qeverisë japoneze, duke shprehur shqetësim serioz se Japonia po i privon viktimat “gra të komfortit” nga e drejta e tyre për të kërkuar të vërtetën dhe kompensim. Vendet ku ka viktima të tilla, duke përfshirë Kinën, kanë paraqitur materiale mbështetëse me kërkesën e mekanizmave përkatës, të cilat janë publikuar në uebsajtin e Zyrës së Komisionerit të Lartë të OKB-së për të Drejtat e Njeriut.

Duke iu përgjigjur pyetjeve përkatëse, Lin tha se prej kohësh në Japoni ekzistojnë forca që përpiqen të mohojnë apo madje të shtrembërojnë historinë e detyrimit të “grave të komfortit”. Pala kineze është thellësisht e shqetësuar për qëndrimin dhe veprimet jo të drejta e jo të sinqerta të Japonisë ndaj historisë së agresionit. Pala japoneze duhet të reflektojë thellë mbi historinë e agresionit dhe mbi krimet e kryera, si edhe mbi vuajtjet e mëdha që u ka sjellë viktimave. Japonia duhet të trajtojë me ndershmëri dhe përgjegjësi çështjet historike, përfshirë atë të “grave të komfortit”, dhe të fitojë besimin e vendeve aziatike dhe të komunitetit ndërkombëtar me veprime konkrete.

Burimi CGTN