Këshilli i Ministrave miratoi sot vendimin për kompensimin financiar të pronarëve të pasurive të paluajtshme të cilat preken nga ndërtimet e legalizuara në Tiranë Rurale 1, Tiranë Rurale 2, Kamzë-Vorë, Durrës-Kavajë-Krujë, Tiranë Veri, Tiranë Jug, Vlorë, Elbasan, Lezhë, Dibër, Zonat e Stimuluara, Fier dhe Shkodër.

Sipas vendimit, vlera totale e kompensimit është 1 miliard lekë për një sipërfaqe 101.752,1 m², e cila do të përfshijë pronarët në disa drejtori vendore të Agjencisë Shtetërore të Kadastrës, përfshirë Tiranë, Durrës, Vlorë, Elbasan, Lezhë, Dibër, Fier dhe Shkodër.

Shuma e kompensimit do të vihet në dispozicion nga Agjencia e Trajtimit të Pronave, ndërsa të ardhurat që rrjedhin nga kalimi i pronësisë përmes shitjes së parcelave ndërtimore, si për pasuritë shtetërore ashtu edhe për pasuritë e të tretëve, do të përdoren për të mbuluar këtë kompensim.

Drejtoritë vendore të Agjencisë Shtetërore të Kadastrës do të kryejnë ndryshimet e nevojshme në regjistrat e pasurive, ndërsa Agjencia Shtetërore e Kadastrës dhe Agjencia e Trajtimit të Pronave ngarkohen me zbatimin e vendimit.

Burimi ATSH