Zëvendëskryeministrja dhe ministrja e Infrastrukturës dhe Energjisë, Belinda Balluku, nënvizoi sot se energjia shqiptare prodhohet kryesisht nga burime të rinovueshme, dhe për këtë arsye ka taksë zero të karbonit.

Në takimin për prezantimin e parkut eolik në Tropojë, ku të pranishëm ishin edhe kryeministri Edi Rama dhe e ngarkuara me punë e Ambasadës së SHBA-së në Tiranë, Nancy VanHorn, Balluku shpjegoi se Shqipëria ka investuar në mënyrë strategjike në energji të qëndrueshme si hidrocentrale, parqe eolike dhe energji diellore.

“Nuk po flasim më për plane në letër, por për megavat-orë të instaluara, për miliarda euro investime të huaja dhe projekte që funksionojnë në terren, duke vjelur avantazhet e një sistemi që garanton se prodhimi energjetik vjen nga burime të rinovueshme. Për rrjedhojë, taksa e karbonit për energjinë me origjinë shqiptare, sipas Komisionit Europian, është zero. Kjo sepse Shqipëria ka investuar në mënyrë të zgjuar dhe ka politika të qarta që garantojnë integrimin e tregut energjetik me atë europian”, tha Balluku.

Që nga 1 janari i këtij viti, në Bashkimin Europian ka hyrë në fuqi taksa e karbonit, e cila do të zbatohet për të gjitha vendet që nuk janë pjesë e BE-së dhe që eksportojnë në tregun e BE-së. Kjo do të thotë se çdo prodhues energjie elektrike jashtë BE-së do të duhet të paguajë një taksë shumë të lartë karboni kur eksporton. Për Shqipërinë, kjo ka një rëndësi të veçantë, sepse vendi ynë ka energji 100% nga burime të rinovueshme dhe nuk ka nevojë të paguajë taksë karboni. Kjo e vendos Shqipërinë në një pozicion shumë të favorshëm konkurrues në krahasim me vendet e rajonit, ku prodhuesit do të duhet të paguajnë taksa të larta karboni për eksportet drejt BE-së.

Burimi ATSH