Instituti Kombëtar i Trashëgimisë Kulturore, duke u uruar shqiptarëve Vitin e Ri renditi edhe arritjet e tij sa i takon vitit 2025, ku janë regjistruar rritje historike në ndërhyrjet në mbrojtje të trashegimisë kulturore.

Viti 2025 pati 309 % më shumë projekte në restaurim dhe konservim se sa viti 2024; 363 % më shumë investime në objekte pasuri kulturore krahasuar me 2024; 223 % më shumë monitorime dhe inspektime në site arkeologjike krahasuar me 2024.

Gjatë vitit 2025 u shpallën 5 Qendra Historike dhe Ansamble Urbane të reja: Lini, Rabdishti, Elbasani, Peshkopia dhe Konispoli. Gjithashtu nisi Programi i Rijetëzimit të Kullave, objekte të shpallura Monumente Kulture, në 4 qarqe: Lezhë, Kukës, Dibër dhe Shkodër. Ky program përfshin restaurimin, rijetëzimit e zhvillimin e sipërmarrjeve si bujtina, qendra kulturore e muzeale.

Ndër restaurimet e kryera nga IKTK-ja mund të përmenden ai i Manastirit të Spilesë, Gjirokastër, Kisha e Shpërfytyrimit në Herbel të Dibrës, Kisha e Shën Mërisë në Bishqethëm të Lushnjës, Banesa e Angonatëve, e Ficove, Ura e Niçës në Pogradec, Sarajet e Myfti Beut në Libohovë, Xhamia e Allajbegisë në Dibër, Termet dhe Nimfeu i Bradasheshit, si dhe u realizuan shumë gërmime arkeologjike, inspektime, trajnime e kërkime shkencore.

Marrë nga ATSH