Ministri i Turizmit, Kulturës dhe Sportit, Blendi Gonxhja u takua sot me homologun kroat, Tonči Glavina gjatë qëndrimit në Riad ku morën pjesë në Asamblenë e 26-të të Përgjithshme të UN Tourism.

Në një postim në rrjetet sociale, Gonxhja informoi se gjatë takimit ndau me homologun kroat jo vetëm vlera të përbashkëta mesdhetare, por edhe një vizion të përbashkët për zhvillimin e turizmit dhe shkëmbimeve kulturore e sportive.

“Kroacia mbetet një model i suksesshëm në menaxhimin e destinacioneve dhe në ndërtimin e një marke të fortë kombëtare në turizëm, ndaj dhe bashkëpunimi mes dy vendeve tona është një mundësi e vlefshme për të shkëmbyer përvoja dhe për të ndërtuar iniciativa të përbashkëta që forcojnë rajonin tonë si destinacion konkurrues dhe tërheqës”, tha Gonxhja.

Ministri i Turizmit, Kulturës dhe Sportit mori pjesë në Riad në Asamblenë e 26-të të Përgjithshme të UN Tourism. Në kuadër të këtij samiti po zhvillohen takime dhe diskutime mbi zhvillimin e turizmit të qëndrueshëm, nxitjen e partneriteteve ndërkombëtare, inovacionin dhe përmirësimin e strategjive turistike në nivel global. Gonxhja pati takime me me Sekretarin e Përgjithshëm të UN Tourism, Zurab Pololikashvili, si dhe me Khaby Lame, influencerin me mbi 200 milionë ndjekës në rrjetet sociale dhe tashmë Ambasador Social i UN Tourism.

Burimi ATSH