Kryetarja e Autoritetit të Mediave Audiovizive, Armela Krasniqi mori pjesë sot në Asamblenë e 24-të Plenare të Rrjetit Mesdhetar të Enteve Rregullatore të Mediave, MNRA në Prishtinë (Kosovë).

Në panelin hapës merrnin pjesë gjithashtu Frederic Bokobza, zëvendësdrejtor i përgjithshëm i rregullatorit francez, ARCOM, Joana Duarte, drejtoreshë e departamentit të Mbikëqyrjes në autoritetin portugez, ERC, Francesco Di Giorgi, zyrtar i lartë ligjor pranë rregullatorit italian AGCOM dhe Klevis Vaqari, psikologe nga koalicioni i OJQ-ve për Mbrojtjen e Fëmijëve në Kosovë.

Në këtë panel u diskutua një temë e rëndësishme që është objektiv kryesor i punës së AMA-s, “Mbrojtja e fëmijëve online”.

Në fjalën e saj, Krasniqi theksoi rëndësinë jetike të mbrojtjes së fëmijëve nga përmbajtjet e dëmshme, si një dimension thelbësor i misionit rregullator.

Krasniqi gjithshtu shpjegoi edhe qasjen gjithëpërfshirëse të AMA-s në këtë proces, me kuadrin ligjor, përputhjen me legjislacionin europian, rolin e Këshillit të Ankesave, rezultatet e monitorimit në këtë drejtim dhe nismat për edukimin mediatik të fëmijëve, prindërve dhe mësuesve.

“Një pikë e rëndësishme është bashkëpunimi me Platformat e Mëdha Online si një hallkë e domosdoshme në realizimin me sukses të punës tonë”, tha Krasniqi.

Ky panel solli perspektiva të çmuara nga vende të ndryshme, duke konfirmuar rolin gjithnjë e më të rëndësishëm të rregullatorëve në ndërtimin e një mjedisi të sigurt digjital për fëmijët, përmes bashkëpunimit rajonal dhe qasjes gjithëpërfshirëse.

Komisioni i Pavarur i Mediave të Kosovës, KPM, përveçse enti organizator mori sot presidencën e radhës së MNRA-së.

Burimi ATSH