Kryetari i bashkisë së Shkodrës, Benet Beci bëri të ditur sot se për vendet vakante në administratën vendore kanë ardhur në total 393 aplikime.

“393 aplikime për të kontribuar së bashku për Shkodrën. Dua të falënderoj të gjithë qytetarët që iu përgjigjën thirrjes sonë për të aplikuar për t’u bërë pjesë e administratës vendore”, u shpreh Beci.

Sipas tij, “fakti që morëm 393 aplikime është një dëshmi e besimit dhe gatishmërisë së qytetarëve për të dhënë kontributin e tyre në zhvillimin e qytetit dhe të njësive tona administrative”.

Beci njoftoi se nga dita e hënë, 4 gusht, nis procesi i intervistave, i cili do të zhvillohet në ambientet e Bashkisë Shkodër.

“Të gjithë aplikantët do të njoftohen individualisht për datën dhe orën e intervistës së tyre.

Ky është vetëm fillimi i një procesi për të ndërtuar një administratë më të hapur, më funksionale dhe më pranë qytetarëve. Faleminderit për besimin dhe angazhimin tuaj për Shkodrën”, u shpreh ai.

Thirrja për aplikime për vendet në administratën vendore u çel pas analizës së performancës së institucioneve vendore dhe një sërë dorëheqjesh nga pozicione të ndryshme.