Durana Tech Park në Xhafzotaj (Durrës), i pari park teknologjik në Shqipëri, që synohet të pozicionohet si një qendër e fuqishme e zhvillimit ekonomik dhe inovativ, do të konkurrojë në rajon dhe globalisht, duke sjellë përparësi strategjike dhe zhvillim të qëndrueshëm ekonomik për vendin.

Në një konferencë për mediet, ministri i Ekonomisë, Kulturës dhe Inovacionit, Blendi Gonxhja deklaroi sot se Parku Teknologjik Durana do të jetë një pol i rëndësishëm zhvillimi rajonal.

Gonxhja theksoi se ky projekt pritet të sjellë investime të huaja, vlerë të shtuar dhe transferim të dijeve, duke ndihmuar startup-et të kthehen në biznese të qëndrueshme.

Po ashtu theksoi ai, synohet krijimi i mundësive të reja për punësim dhe aftësim profesional dhe kthimi i autostradës Tiranë-Durrës në një pol rajonal të zhvillimit teknologjik.

“Përfitimet e ekonomisë shqiptare nga implementimi i projektit “Durana” do të jenë të shumanshme. Së pari, tërheqja e investimeve të huaja, falë infrastrukturës që ky park do të ofrojë, avantazheve krahasuese të Shqipërisë dhe lehtësive fiskale. Së dyti, është vlera e shtuar, një nga problemet e kahershme të ekonomisë tonë, e cila gjithnjë ka prodhuar pak vlerë të shtuar. Një projekt i tillë do ndihmojë ndjeshëm bilancin tregtar shqiptar. Së treti, transferimi i njohurive dhe dijeve në fuqinë punëtore lokale, duke ndihmuar kështu në modernizimin e ekonomisë shqiptare në tërësi. Së katërti, përmes programeve të akselerimit dhe inkubimit, Durana do të ndihmojë shumë startup-e të shndërrohen në biznese të mirëfillta e gjithashtu do ndihmojë edhe universitetet apo institucionet arsimore që të modernizojnë mësimdhënien e tyre”, deklaroi ministri.

Drejtorja e përgjithshme e Korporatës Shqiptare të Investimeve (AIC), Elira Kokona e cilësoi atë si motor të zhvillimit ekonomik.

“Durana është parku i parë teknologjik në vend dhe përmes këtij parku, Shqipëria synon të kthehet në lider rajonal në zhvillimin e teknologjive. Do tërheqim ata që duan të punojnë në park, por edhe për të jetuar në Shqipëri. Durana është një platformë që mbështet teknologjinë, nomadet digjitalë dhe startup-et. Ky hap e pozicionon Shqipërinë në hartën globale të inovacionit”, theksoi ajo.

Kokona informoi se deri tani kanë shprehur interes për të qenë pjesë e Duranës 50 kompani.

“Ky park do të ofrojë mundësinë e biznesit me lehtësi të shumta fiskale”, tha ajo.

Ndër lehtësitë fiskale, Durana renditi tatim mbi fitimin 0% për 15 vitet e para, përjashtimin nga tatimi mbi pagat e punonjësve për 10 vjet për të gjithë personelin e angazhuar në kërkim dhe zhvillim, përfshirë edhe zhvilluesit, përjashtim nga TVSH-ja për mallrat, pajisjet dhe shërbimet e përdorura në park për prodhimin e produkteve inovative.

Po ashtu, përjashtim nga tatimi mbi ndikimin në infrastrukturë, nga tatimi mbi pronat për 10 vjet, për ndërtimet e ngritura brenda parkut, si dhe rimbursim pjesor shtetëror për kostot e trajnimit të personelit shkencor dhe teknik, sipas kritereve dhe procedurave të aprovuar nga qeveria.

Kokona informoi po ashtu se do të ketë procedura doganore të thjeshtuara për importin dhe eksportin e mallrave të nevojshme për zhvillimin e produkteve inovative, sipas rregulloreve të Kodit Doganor dhe TVSH në nivelin 0% për mallrat shqiptare të furnizuara në park për prodhimin e produkteve inovative, të cilat, sipas legjislacionit të TVSH-së dhe doganor, trajtohen si eksport.

Sipas saj, nga nëntori e deri tani, 53 kompani kanë shprehur interes për tu vendosur pranë “Durana Tech Park”.

“Ne ju drejtuam kompanive për të parë gatishmërinë e tyre për tu vendosur në Durana. 53 kompani shprehën interes. Jemi në kushtet e një suksesi tashmë të deklaruar”, tha Kokona.

Qëllimi i Durana Tech Park është që të krijojë një mjedis të veçantë ekonomik dhe teknologjik që ofron kushte të favorshme për zhvillimin e industrive të avancuara. Fokusi i tij është të nxisë investimet vendase dhe të huaja dhe të krijojë një territor me një regjim fiskal dhe doganor të lehtësuar.

Së bashku me TEDA Tirana (Prush), e cila shumë shpejt do të mirëpresë investitorët e parë, “Durana” vjen si zona tjetër e re speciale ekonomike me synim tërheqjen e investitorëve.