Komisioni për Sigurinë Kombëtare, me mbështetjen e Prezencës së OSBE-së zhvilloi një vizitë dyditore në Parlamentin e Maqedonisë së Veriut, ku zhvilloi takime me kryetarin e Kuvendit të Republikës së Maqedonisë së Veriut, Afrim Gashi; me Komisionin për Çështjet e Mbrojtjes dhe Sigurisë, Komisionin për Mbikëqyrjen e Veprimtarisë së Agjencisë Kombëtare të Inteligjencës si dhe Komisionin për Mbikëqyrjen e Përcjelljes së Komunikimeve Elektronike.

Kryetari i Kuvendit të Republikës së Maqedonisë së Veriut vlerësoi bashkëpunimin e deritanishëm mes dy vendeve, si dhe shprehu gatishmërinë e tij për vijimin dhe intensifikimin e këtij bashkëpunimi, sidomos në çështjet e sigurisë dhe mbrojtjes të cilat janë kryefjala e politikës aktuale në çdo vend të botës.

Kryetari i Komisionit, Nasip Naço dhe zëvendëskryetari, Ferdinand Xhaferaj, theksuan rëndësinë e takimeve dypalëshe për të shkëmbyer ide dhe përvoja të cilat janë të nevojshme për veprimtarinë parlamentare të të dyja vendeve, dhe për më tepër edhe në nivel rajonal me komisionet e mbrojtjes dhe sigurisë të parlamenteve të Ballkanit Perëndimor.

Gjatë diskutimeve nga të dyja palët u vlerësua mbështetja e vazhdueshme që OSBE ofron në këto procese për realizimin sa më efektiv të kontrollit parlamentar ndaj agjencive shtetërore të sigurisë dhe inteligjencës.

Fokus të veçantë mori diskutimi i ligjit aktual për shërbimin informativ, ndryshimet e nevojshme që duhen bërë duke gjetur gjuhën e përbashkët e të mirëkuptimit mes opozitës dhe mazhorancës si dhe ngritjen e nënkomisioneve për mbikëqyrjen e agjencive të inteligjencës, vlerë e shtuar kjo në Parlamentin e Maqedonisë së Veriut ku ka 3 komisione parlamentare me përmbajtje të fokusuar drejtpërdrejt në këto çështje, e cila mund të merret si eksperiencë.

Në përfundim të takimeve kryetari i Komisionit, Naço në emër të komisionit falënderoi për mikpritjen kryetarin e Kuvendit të Republikës së Maqedonisë së Veriut, Afrim Gashi dhe të gjithë deputetët e pranishëm në takim, si dhe shprehu angazhimin e tij maksimal për intensifikimin e këtyre takimeve të cilat janë në interes të përbashkët të të dyja vendeve.

(ATSH)