Mbledhja e 15-të e nënkomitetit “Për tregtinë, industrinë, doganat dhe tatimet”, mes Shqipërisë dhe Bashkimit Evropian po zhvillohet përgjatë datave 23 dhe 24 tetor 2024, në Bruksel, nën drejtimin e Ministrisë së Financave.

Në hapje të takimit u theksua rëndësia e tij, ku raportimi i palës shqiptare në nënkomitet po ndodh në një moment historik pas zhvillimit të Konferencës së Dytë Ndërqeveritare me BE-në, ku u çel grupkapitulli “Themelorët” në tryezën e negociatave për anëtarësim në Bashkimin Evropian, duke përforcuar bashkëpunimin e mëtejshëm në implementimin e reformave të nevojshme për integrimin e Shqipërisë.

Drejtori i Përgjithshëm i Doganave, Genti Gazheli, i cili drejton delegacionin shqiptar, u shpreh se Shqipëria ka një kuadër ligjor në shkallë tejet të lartë të përputhur me legjislacionin evropian dhe mbetet thellësisht e angazhuar për përafrimin e plotë me “acquis communitaire” në fushën e doganave.

Përfaqësuesit e Komisionit Europian vlerësuan pozitivisht progresin e Shqipërisë, veçanërisht të Administratës Doganore Shqiptare sa i përket nivelit të përgatitjes ligjore, institucionale e administrative.

Nënkomiteti mbulon raportimin një vjeçar të palës shqiptare kryesisht për kapitullin 16 “Tatimet”, kapitullin 29 “Bashkimi doganor”, kapitullin 1 “Lëvizja e lirë e mallrave”; dhe kapitullin 20 “Ndërmarrjet dhe politikat industriale”.

Nga diskutimet e ditës së parë, ndër çështjet kryesore të vlerësuara dhe me rëndësi për tu përmendur janë miratimi i draft Strategjisë Afatmesme të të Ardhurave 2024-2027; masat e ndërmarra në kuadër të Planit të Rritjes; ecuria mbi implementimin e ligjit të ri të të ardhurave; përmbyllja me sukses e procesit të fiskalizimit dhe avantazhet e kësaj reforme; implementimi i Strategjisë së Biznesit të Administratës Doganore Shqiptare për vitet 2023–2027; lehtësimi i mëtejshëm i procedurave doganore për operatorët ekonomikë; si edhe ndryshimet ligjore të Kodit Doganor Shqiptar dhe dispozitave zbatuese të tij në kuadër të përafrimit me acquis e BE-së.

Përfaqësuesit e KE-së vlerësuan pozitivisht zhvillimet dhe reformat e ndërmarra nga Shqipëria në këto fusha, ndërkohë që ditën e dytë do të vijohet raportimi mbi ecurinë në fushën e lëvizjes së lirë të mallrave, politikave industriale e ndërmarrjet e vogla dhe të mesme dhe zhvillimet në fushën e turizmit. (ATSH)