Nikki Haley dhe Ron DeSantis, dikur rivalë të ashpër të Donald Trump në garën për nominimin presidencial republikan, gjatë fjalimeve të tyre në konventën kombëtare të partisë – rikonformuan mbështetjen e tyre të plotë për ish-presidentin amerikan.
“Donald Trump ka mbështetjen time të madhe”, tha dje Haley në Konventën Kombëtare Republikane në Milwaukee, Wisconsin.
Trump u emërua zyrtarisht të hënën si kandidati presidencial i Partisë Republikane për zgjedhjet e nëntorit.
Haley u largua nga gara pasi humbi kundrejt Trump në zgjedhjet paraprake.
Marrëdhëniet midis Haley, një ish-guvernatore e Karolinës së Jugut, dhe Trump kishin qenë të tensionuara.
Haley ka sulmuar personalisht Trump – duke vënë në pikëpyetje nëse ish-presidenti ishte i aftë mendërisht për të kandiduar për postin. Ndërsa Trump e kishte shënjestruar Haley si një vajzë emigrantësh indianë, me komente raciste.
Ndërsa Haley dhe DeSantis, guvernatori i Floridës, i cili u largua nga gara pas zgjedhjeve paraprake të Iowa-s në janar, e kanë mbështetur publikisht Trumpin, mbështetja e tyre e shprehur në konventën kombëtare shihet si një sinjal i unitetit brenda Partisë Republikane.
“Ne duhet të pranojmë se ka disa amerikanë që nuk pajtohen me Donald Trump 100% të rasteve. Unë i njoh disa prej tyre dhe dua të flas me ta sonte”, tha Haley.
“Unë jam këtu sonte sepse ne kemi një vend për të shpëtuar dhe një Parti e bashkuar Republikane është thelbësore për ta shpëtuar atë”, shtoi ajo.
“Është koha për të sjellë sërish Donald Trump në Shtëpinë e Bardhë”, tha DeSantis.
