Ministri i Brendshëm, Taulant Balla foli sot për procesin e vetingut në Polici, ndërsa theksoi se për këtë nevojitet mbështetja e SPAK dhe institucioneve të tjera.

Në një intervistë televizive, Balla u shpreh se rezultatet e deritanishme të Agjencisë së Mbikëqyrjes Policore janë të mira.

“Por në vlerësimin tim janë të pamjaftueshme sa kohë deri tani jemi në nivel shefash komisariati. Pa pasur drejtorë departamentesh nuk quhet e suksesshme”, tha ai.

Balla u shpreh se “kemi ringjallur siç duhet procesin e vetingut”.

“Kemi pasur edhe shkarkime edhe dorëheqje, por kjo duhet të intensifikohet. Në këtë proces janë të përfshirë të gjithë. Pa mbështetjen e SPAK, prokurorive të juridiksionit të përgjithshëm të SHISH dhe institucioneve të tjera është e vështirë që ky proces të shkojë në këto nivele. Unë jam besimplotë që do të kemi edhe drejtorë”, tha ai.

Balla garantoi qytetarët e Tiranës dhe 19 qyteteve të tjera të mëdha se shumë shpejt do të kemi një sistem të ri me kamera duke u referuar projektit “Smart City”.

Ministri siguroi se Shqipëria do të ketë sistemin më të mirë të kamerave jo vetëm në Ballkanin Perëndimor, por në Europë.

Duke folur për angazhimin e Policisë gjatë sezonit veror, Balla u shpreh se “të gjitha patrullat e policisë do të jenë të pajisura me aparatura që masin nivelin e ndotjes akustike dhe e provojnë këtë shkelje”.

“1600 forca policie nga pjesët e tjera të territorit do të spostohen nga Velipoja në Konispol”, tha ai.

“Presim të kemi në rrugët e Shqipërisë gjatë gjithë vitit 4.5 milionë makina. Menaxhimi i trafikut është shumë i vështirë, por falë korridoreve të reja që po krijohen do ketë impakt të lartë, si hapja e tunelit të Llogorasë”, tha Balla.

(Marrë nga ATSH)