Në ambientet e Zyrës së Interesave të Kosovës në Athinë para publikut grek, kolegëve diplomat si dhe pjesëmarrës të tjerë artdashës është hapur ekspozita e piktorit nga Kosova, Gjyljan Fetaj.

Me veprat e tija artistike, të aranzhuara në 45 piktura, piktori ka pasqyruar një copë përditshmërie në Kosovën e viteve të 90-ta të shekullit të kaluar.

Krejt këto janë bashkuar në “Fragmente”.

Në sytë e piktorit çdo imazh është një ngjarje qe ka ndodh në ??Kosovë dhe për autorin secila pamje është një dokument vizuel.

Këto imazhe të ngjarjeve reale, si shprehje abstrakte, të aranzhuara në forma konkrete, përmes transformimit në paraqitje, karakter, rrethana dhe funksion, “janë emocione të shekullit të kaluar që kanë prit me i vendos në ketë shekull”.

Ekspozita shpie në Kosovën e viteve të 90-ta të shekullit të kaluar, nën okupim, kur po rritej një gjeneratë, e cila po përjetonte një dallim aq të madh ndërmjet botës së lirë shpirtërore dhe realitetit, me mungesë absolute të lirisë.

Një gjeneratë, e cila mund të ishte dorëzuar para dëshpërimit, persekutimeve dhe vdekjes, por e cila zgjodhi të rilind brenda pak viteve të rinisë së saj.