Dhoma Amerikane e Tregtisë nënvizoi se, vetëm nëpërmjet bashkëpunimit biznes-institucione publike mund të krijohet një kornizë e qartë e kualifikimeve dhe aftësive në tregun e punës, që reflekton nevojat sektoriale dhe ndihmon në evidentimin dhe profilizimin e profesioneve të reja.

Në këtë drejtim, Dhoma Amerikane e Tregtisë shprehu gjithë gatishmërinë për të bashkëpunuar me të gjithë aktorët, agjencitë dhe drejtoritë e linjës, që kanë një ndikim në formimin e kornizës kombëtare të kualifikimeve dhe aftësive profesionale, për të sjellë një përmirësim në tregun e punës dhe mundësi për të adresuar qartë shqetësimet që ka biznesi.

“Sot falë punës së këtyre institucioneve, tregu ka 126 tituj profesionalë kualifikimesh, të cilat janë ndërtuar dhe mbështetur në sinjalet që kanë ardhur nga vetë biznesi si dhe një platformë të sistemit ESKO, i cili mund të aksesohet në portalin e-Albania dhe ka rreth 13 800 aftësi profesionale me të gjithë kompetencat përkatëse. Një vlerësim i saktë i pozicioneve dhe kualifikimeve do të zgjidhë edhe çështjen e nivelit të pagës duke ndihmuar në vlerësimin dhe zhvillimin e forcave të punës”, thuhet në njoftimin për shtyp të Dhomës Amerikane të Tregtisë.

Për ta bërë të mundur këtë, përfaqësuesit e Dhomës Amerikane e Tregtisë kërkuan një koordinim eficient, në radhë të parë duke shkëmbyer në kohë reale informacionin që institucionet sigurojnë dhe më pas duke gjetur rrugët më të mira të angazhimit të biznesit në grupet e punës për kualifikimet profesionale. /ATSH