Presidenca u ndriçua mbrëmjen e sotme me dritë blu në Ditën Ndërkombëtare të Ndërgjegjësimit për Autizmin.

Institucioni i Presidentit u ndriçua me ngjyrën blu në sintoni me institucione të tjera kudo në botë, ndërsa dha edhe një mesazh.

“Le të tregojme të gjithë së bashku më shumë dashuri, më shumë kujdes, më shumë vëmendje institucionale ndaj personave me çrregullime të spektrit autik!”, thuhet në mesazhin që shoqëron pamjet e institucionit.

Dita Botërore e Autizmit synon të rrisë ndërgjegjësimin lidhur me çrregullimet e spektrit të autizmit dhe përmirësimin e jetës së atyre që jetojnë me autizëm. Vlerësohet se 1% e popullatës globale është autike.

Dita Botërore e Autizmit është vendosur nga Asambleja e Përgjithshme e Kombeve të Bashkuara, me rezolutën “62/139” në vitin 2007, më tepër si një përpjekje për t’i dhënë fund diskriminimit ndaj personave me autizëm. Kjo ditë është vendosur në 2 Prill dhe është përfshirë në Agjendën e Zhvillimit të Qëndrueshëm të Kombeve të Bashkuara, e cila premton që askush të mos mbetet pas. /ATSH