Nga Rrjetet sociale

Në kohët e lashta, në një mbretëri, një burrë kreu një krim, për të cilin u gjykua dhe vendimi i trupit gjyqësor ishte varja në litar. Megjithatë, mbreti ndërhyri dhe i ofroi të dënuarit një alternativë tjetër.

Atij i duhej të zgjidhte mes varjes në litar ose të hapte një derë metalike të madhe, të zezë, të mistershme dhe në një vend të errët, pas të cilës e priste diçka e panjohur.

Krimineli u mendua gjatë dhe në fund zgjodhi varjen si opsionin më të lehtë. Kur ia vunë lakun në qafë, ai papritmas tha:”Lartmadhëria juaj! Jam kureshtar të di çfarë fshihet pas asaj dere?”

Mbreti iu përgjigj: “Është shumë e çuditshme, por deri më tani funksionon ende. Të gjithë të dënuarve me vdekje ua kam ofruar si shans, të zgjedhin derën e mistershme dhe paksa të frikshme, por të gjithë, me bindje dhe vullnet të lirë kanë zgjedhur varjen në litar”.

I dënuari iu përgjërua dhe i tha: “Po më thoni çfarë fshihet pas asaj dere! Gjithsesi, askush s’do ta dijë sepse do të varem dhe s’do mund t’i tregoj kujt” dhe bëri me shenjë nga laku rreth qafës.

Mbreti uli kokën dhe pasi u mendua tha:

“Pas derës është liria! Por njerëzit kanë kaq shumë ankth e frikë nga e panjohura, saqë preferojnë litarin para lirisë.”