Kryetari i Kuvendit, Niko Peleshi, zhvilloi një takim me Ambasadoren e re të Zvicrës në Shqipëri, Siri Walt.

“Zvicra është një partnere e rëndësishme në demokratizimin dhe zhvillimin e Shqipërisë. Bashkëpunimi ynë parlamentar do të vijojë të forcohet, me fokus te modernizimi i Kuvendit, transparenca, digjitalizimi dhe përdorimi i inteligjencës artificiale. Mirënjohje për mbështetjen e vazhdueshme dhe besim te mundësitë për ta çuar partneritetin tonë edhe më tej”, shkroi Peleshi në rrjetet sociale.

Nga ana e saj ambasada zvicerane shkruan se, diskutimi u përqendrua te mbështetja e Zvicrës për forcimin e roleve ligjvënëse dhe mbikëqyrëse të Parlamentit, si dhe te bashkëpunimi i ngushtë midis parlamenteve zvicerane dhe shqiptare, veçanërisht në fushën e transparencës dhe angazhimit qytetar.

Ambasadorja Walt theksoi rolin e rëndësishëm që Parlamenti mund të luajë në përfaqësimin e interesave të qytetarëve dhe në lehtësimin e dialogut midis autoriteteve dhe qytetarëve.