Të ardhurat buxhetore për vitin 2027 parashikohen në 907,9 miliardë lekë, ose 30,9% e Prodhimit të Brendshëm Bruto (PBB), ndërsa të ardhurat nga tatimet, doganat dhe kontributet e sigurimeve shoqërore e shëndetësore pritet të rriten me 7,6% krahasuar me vitin 2026.

Ministri i Financave, Petrit Malaj, prezantoi sot projektbuxhetin e vitit 2027 në Konferencën e Kryetarëve, duke theksuar se planifikimi i të ardhurave mbështetet në ecurinë ekonomike, inflacionin, masat e reja fiskale dhe përmirësimin e administrimit tatimor e doganor.

“Të ardhurat buxhetore për vitin 2027 parashikohen në masën 907,9 miliardë lekë (rreth 9,4 miliardë euro), ose sa 30,9% e PBB-së. Ndërsa për vitin 2026, të ardhurat buxhetore parashikohen me rreth 843,1 miliardë lekë, ose 30,2% e PBB-së”, bëri të ditur Malaj.

Sipas ministrit, të ardhurat nga tatimet, doganat dhe kontributet për vitin e ardhshëm janë projektuar duke u bazuar në realizimin e pritshëm të vitit 2026, ecurinë historike të të ardhurave dhe parashikimet makroekonomike.

Në këtë përllogaritje, theksoi Malaj, janë marrë në konsideratë ndikimi i rritjes ekonomike dhe inflacionit, politikat e reja fiskale e buxhetore, efektet e masave të mëparshme dhe të ardhurat shtesë që pritet të gjenerohen nga zbatimi i Strategjisë Afatmesme të të Ardhurave.

“Programimi i të ardhurave për vitin 2027 mbështet synimet e Ministrisë së Financave për rritjen e të ardhurave nëpërmjet miradministrimit tatimor e doganor, realizimin e reformave/investimeve të rëndësishme buxhetore të qeverisë, si dhe mbajtjen nën kontroll të deficitit buxhetor dhe borxhit publik”, u shpreh ministri.

Malaj bëri të ditur se të ardhurat nga tatimet, doganat dhe kontributet e sigurimeve shoqërore e shëndetësore parashikohen në 793,8 miliardë lekë në vitin 2027, me një rritje prej 56 miliardë lekësh krahasuar me të ardhurat e pritshme të vitit 2026.

“Projeksionet e të ardhurave tatimore, doganore dhe të kontributeve parashikojnë që në vitin 2027 të ardhurat totale të arrijnë në rreth 793,8 miliardë lekë, ose 56 miliardë lekë më shumë krahasuar me të ardhurat e pritshme të vitit 2026, duke përfaqësuar një rritje prej 7,6%”, deklaroi ai.

Sipas ministrit, rritja e parashikuar do të mbështetet në disa faktorë, mes tyre zhvillimi ekonomik, inflacioni, masat e reja të paketës fiskale dhe zbatimi i Strategjisë Afatmesme të të Ardhurave.

“Burimet kryesore të kësaj rritjeje vijnë si rezultat i rritjes ekonomike, ndikimit të inflacionit, masat e reja të paketës fiskale dhe zbatimi i masave të Strategjisë Afatmesme të të Ardhurave”, theksoi Malaj.

Burimi ATSH