Familja Mbretërore Shqiptare është shtuar me një anëtar të ri. Ka ardhur në jetë Princi Aleksandër, djali i Princ Lekës dhe Princeshës Blerta.

Lajmi u bë publik përmes një postimi në rrjetet sociale nga Erion Teli, ish-drejtor i Komunikimit i Familjes Mbretërore Shqiptare, i cili ndau emocionet për lindjen e princit dhe uroi çiftin mbretëror për ardhjen në jetë të djalit të tyre.

Në mesazhin e tij, Teli e cilësoi këtë si “një nga ato ditë që fjalët nuk mjaftojnë për të përshkruar gëzimin”, ndërsa falënderoi Princeshën Blerta për, siç shprehet ai, përkushtimin dhe afërsinë e treguar ndaj mbështetësve të Familjes Mbretërore.

Postimi përfundon me urimin: “Mirë se erdhe në jetë, Lartësia e Tij Mbretërore, Princ Aleksandër! Zoti e bekoftë Familjen Mbretërore Shqiptare.”

Deri më tani nuk ka pasur një njoftim zyrtar nga Familja Mbretërore Shqiptare me detaje të mëtejshme mbi lindjen e Princit Aleksandër.