Ministri i Financave, Petrit Malaj njoftoi se nisma e re “Dyfisho ndërmarrjen tënde” do të prezantohet shumë shpejt.

Gjatë një konference për mediet ditën e sotme, lidhur me ecurinë fiskale të tremujorit të parë të vitit, Malaj sqaroi se aktualisht është duke u diskutuar dhe negociuar me Ministrinë e Ekonomisë dhe Inovacionit, Bankën e Shqipërisë dhe bankat e nivelit të dytë, mbi kushtet dhe termat e kredisë për këtë mekanizëm.

Pas përfundimit të negociatave dhe nënshkrimit të marrëveshjes mes palëve, nisma do të bëhet publike dhe produkti përkatës do të shpallet.

Ministri Malaj theksoi gjithashtu se paralelisht me këtë, do të prezantohet një akt normativ që do të përfshijë një garanci shtetërore, e ngjashme me atë që është aplikuar në sektorin e bujqësisë, por që këtë herë do të fokusohet në mbështetje për dyfishimin e kapaciteteve të biznesit dhe rritjen e produktivitetit të ndërmarrjeve.

Burimi ATSH