Ministri i Financave, Petrit Malaj bëri të ditur sot se aktiviteti ekonomik i bizneseve në Shqipëri vazhdon të jetë tejet pozitiv, duke shënuar një rritje të dukshme krahasuar me tremujorin e parë të vitit 2025.

“Në fund të muajit mars, numri i bizneseve të regjistruara dhe aktive ka arritur në 143.875, duke shënuar një rritje prej 5% krahasuar me të njëjtën periudhë të vitit të kaluar. Po ashtu, numri i subjekteve të reja të regjistruara ka shënuar një rritje dyshifrore, duke u regjistruar 6085 biznese të reja përgjatë këtij tremujori, që përbën një rritje prej 12% krahasuar me të njëjtën periudhë të vitit 2025”, deklaroi Malaj.

Një tjetër tregues pozitiv është rritja e qarkullimit të biznesit.

Ministri Malaj tha se gjatë tremujorit të parë, xhiroja e deklaruar e bizneseve ka arritur në 931 miliardë lekë, duke shënuar një rritje prej rreth 600 milionë eurosh krahasuar me vitin e kaluar.

Ai theksoi se kjo rritje është pasojë e një kombinimi faktorësh, ku përfshihen formalizimi më i madh i ekonomisë dhe një xhiro më e saktë e deklaruar nga bizneset.

Po ashtu, nënvizoi ai, një faktor tjetër mbështetës është konsumi i brendshëm, i cili ka mbetur i qëndrueshëm dhe ka kontribuar në rritjen e të ardhurave dhe punësimit.
Sektorët e shërbimeve dhe tregtisë, sipas tij, vazhdojnë të mbeten dy motorët kryesorë të zhvillimit ekonomik të Shqipërisë.

“Ky rezultat tregon një dinamikë pozitive dhe një zhvillim të qëndrueshëm të ekonomisë shqiptare, duke u mbështetur në përmirësimin e kushteve të biznesit dhe fuqizimin e konsumit dhe punësimit në vend”, deklaroi Malaj.

Marrë nga ATSH