Ministrja e Shtetit për Administratën Publike dhe Antikorrupsionin, Adea Pirdeni deklaroi sot se procesi i integrimit të Shqipërisë në Bashkimin Evropian do të përshpejtohet përmes angazhimit të diasporës.

Gjatë panelit “Rrënjët që rikthejnë vlerë. Nga përvoja ndërkombëtare në administratë publik”, që po mbahet në kuadër të Samitit të Diasporës, ministrja theksoi se bashkëpunimi i shqiptarëve jashtë vendit është kyç për avancimin e procesit të anëtarësimit në BE.

Pirdeni theksoi se Mali i Zi dhe Shqipëria janë vendet pararojë në procesin e anëtarësimit në BE.

Ajo shprehu vlerësimin për administratën publike ka qenë në nivelin e duhur për tju përgjigjur këtij procesi dhe theksoi se sfidat që duhen kapërcyer janë të mëdha, por që mund të zgjidhen duke u angazhuar së bashku.

“Është e rëndësishme që në këtë fazë të procesit të jemi të fuqizuar dhe të shtrijmë dorën për të bashkëpunuar me ata që jetojnë jashtë Shqipërisë, por që me zemër dhe shpirt janë gjithmonë të angazhuar për zhvillimet në vendin tonë”, tha Pirdeni.

Ministrja Pirdeni gjithashtu theksoi se përparësia kryesore është që Shqipëria të afrohet me standardet europiane, dhe çdo ditë bëhen përpjekje për të përmbushur këto kërkesa.

Ministrja u shpreh se thirrja e saj për të rinjtë dhe ekspertët që jetojnë jashtë Shqipërisë është të kontribuojnë për të ardhmen e vendit dhe për t’u angazhuar në një moment me rëndësi kritike për integrimin europian.

Në kuadër të negociatave për anëtarësimin në BE, Ministrja Pirdeni informoi mbi vendimin e qeverisë për krijimin e dy këshilltarëve të dedikuar për çdo ministri, të cilët do të angazhohen në procesin e negociatave, duke ofruar mbështetje të drejtpërdrejtë dhe të specializuar.

“Ne besojmë që çdo kontribut dhe angazhim i çdo qytetari shqiptar, kudo që ndodhet, është i rëndësishëm dhe do të ndihmojë në realizimin e synimeve tona për anëtarësimin në BE. Diskutimet e sotme janë një mundësi për të ndarë eksperienca dhe për të nxitur bashkëpunimin ndërmjet profesionistëve dhe ekspertëve shqiptarë nga Shqipëria dhe diaspora”, deklaroi Pirdeni.

/Marrë nga ATSH