Në kishën trikonshe në kalanë e Drishtit, Shkodër, Monument Kulture i kategorisë së parë, kanë nisur punimet restauruese.

Ministri i Turizmit, Kulturës dhe Sportit, Blendi Gonxhja thekson se kjo kishë është një dëshmi e çmuar e arkitekturës kishtare të shek. X–XI me planimetri të rrallë me tre absida, e cila për vite me radhë është lënë në harresë dhe e ekspozuar ndaj degradimit.

“Ndërhyrja e hartuar nga Drejtoria Rajonale e Trashëgimisë Kulturore Shkodër përfshin pastrim të kontrolluar të vegjetacionit, konsolidim të muraturave dhe restaurim të strukturës së gurit”, tha Gonxhja.

Ministri bëri të ditur se procesi po zhvillohet me kujdes ndaj monumentit dhe mjedisit përreth.

Kalaja e Drishtit ndodhet 800 metra mbi nivelin e detit me një largësi prej 15 kilometrash nga qyteti i Shkodrës.

Ajo ngrihet mbi luginën e lumit Kir, në pjesēn fundore të saj, dhe është një nga dëshmitë më të rëndësishme të qytetërimit mesjetar në arealin e Shkodrës. Dikur pjesë e qytetit të fortifikuar të Drishtit, ajo shërbeu si pikë strategjike mbrojtjeje dhe si qendër e rëndësishme administrative gjatë Mesjetës, veçanërisht në periudhën e sundimit venedikas.

Edhe sot, muret dhe rrënojat e saj mbajnë gjallë kujtesën e një qyteti që kishte një rol të rëndësishëm në historinë e mesjetës arbërore.

Kalaja e Drishtit është shpallur “Monument Kulture” që prej vitit 1948.