Ministrja e Arsimit, Mirela Kumbaro zhvilloi sot bashkëbisedim me mësuesit, në ambientet e shkollës 9-vjeçare “Ndre Mjeda” në Shkodër.

Të pranishëm në këtë aktivitet, ishin edhe zëvendëskryeminstrja Albana Koçiu dhe kryetari i Bashkisë Shkodër, Benet Beci, ndërsa në fokus të diskutimeve ishin prioritetet për rritjen e pagave në arsim dhe mbështetjen e vazhdueshme të qeverisë.

Ministrja Kumbaro nënvizoi se investimet në arsim lidhen ngushtë me rritjen ekonomike, duke sjellë në vëmendje projektet e shumta të realizuara në Shkodër dhe në të gjithë qarkun.

Sipas saj, falë rritjes ekonomike është bërë e mundur rritja e pagave dhe e investimeve në arsim. Ajo përmendi indeksimin prej 2.5% të pagave, që ka sjellë rritje për mësuesit, si edhe përmirësimin e pagës minimale për stafin mbështetës, i cili tashmë përfiton 50 mijë lekë të reja si pagë minimale.

“Falë rritjes ekonomike mund të rrisim rrogat dhe investimet. Krahasur me 5-6 vite më parë ky është një ndryshim i madh. Në janar hyri në fuqi indeksimi prej 2.5% i rrogave edhe kjo u përkthye në rritje për pagat e mësuesve, dhe garantimi për një pjesë tjetër të stafit pa të cilët nuk e bëjmë dot punën tonë, ai stafi që shërben me rrogën minimale prej 500 mijë lekë të vjetra”, tha Kumbaro.

Ministrja theksoi rëndësinë e kushteve në shkolla, duke u shprehur se cilësia e mësimdhënies lidhet drejtpërdrejt me infrastrukturën, ngrohjen, ndriçimin, laboratorët në mënyrë që shkolla të jetë jo vetëm detyrim, por edhe kënaqësi për nxënësit.

Duke e cilësuar Shkodrën dhe Korçën si qendra të rëndësishme të kulturës dhe arsimit në Shqipëri, ajo u ndal edhe te sfidat e sistemit arsimor, përfshirë provimin e lirimit dhe atë të Maturës Shtetërore. Kumbaro bëri të ditur se prej muajsh është punuar për zbatimin e rregullores së re të Maturës, duke theksuar se përgjegjësia për një proces të suksesshëm është e përbashkët.

“Ka qenë një vit i ngarkuar jo vetëm me detyrimet që kemi në kurrikulat tona, por edhe me gjithë paketën e programit pas shkolle. E kemi quajtur shkolla qendër komunitare, ku zhvillohen detyrat e shtëpisë, aktivitete arti dhe zeje. Të gjitha këto janë pjesë e programit pas shkolle. Me ndryshimet që bëmë në ligjin e arsimit në muajin mars, kemi bërë edhe një korrigjim lidhur me disnivelin e pagave, i krijuar nga vendimi i vitit 2024, i cili parashikonte rritjen e pagave dhe ndarjen e tyre sipas vjetërsisë”, vijoi ajo.

Kumbaro tha se ndryshimet ligjore të miratuara në mars synojnë edhe korrigjimin e diferencave në paga të krijuara për shkak të niveleve të ndryshme të diplomave, që kanë prekur mbi 6 761 mësues.

“Për shkak të niveleve të ndryshme të diplomave, për 6 761 mësues u krijuan disnivele pagash, të cilat vijnë si rezultat i ndryshimeve në sistem dhe jo për faj të vetë mësuesve. Në momentin që u krijua ky disnivel, disa grupe interesi e çuan çështjen në Gjykatën Kushtetuese. Pas zhbllokimit të procesit gjyqësor, në bashkëpunim me Komisionin për Arsimin në Kuvend, u bë korrigjimi i ligjit. Ky i fundit pritet të hyjë në Fletoren Zyrtare dhe të nisë korrigjimi i këtij disniveli”, theksoi ajo.

Gjithashtu, Kumbaro njoftoi se është hapur aplikimi në portal për mësuesit që janë në sistem, por nuk kanë dhënë ende provimin e shtetit, duke theksuar se pajisja me licencë është detyrim ligjor për ushtrimin e profesionit.

Kumbaro theksoi vendimin e qeverisë për të dyfishuar pagesën për orët e programit pas shkolle, si dhe ftoi mësuesit në pension dhe ata në listë pritjeje që t’i bashkohen kësaj nisme dhe të kontribuojnë në edukimin e brezave të rinj.

Burimi ATSH