Interesi për trashëgiminë kulturore vijon të rritet, ndërsa mbi 1000 vizitorë vendas dhe të huaj kanë vizituar Muzeu i Krujës gjatë të dielës së fundit të muajit mars, në kuadër të nismës “E diela e muzeve”.

Lajmi u bë i ditur nga kryeministri Edi Rama, i cili ndau në rrjetet sociale pamje nga Muzeu i Krujës, ku shfaqet një fluks i shtuar vizitorësh dhe turistësh që po zgjedhin të eksplorojnë historinë dhe kulturën shqiptare.

Hapësira muzeale e Krujës vijon të tërheq interes të lartë, teksa është kthyer në pikë referimi për turizmin kulturor dhe edukimin e publikut mbi vlerat historike të vendit.

Nisma “E diela e muzeve” synon të nxisë frekuentimin e institucioneve kulturore dhe të afrojë më shumë qytetarët me trashëgiminë historike, duke promovuar njëkohësisht edhe turizmin kulturor në Shqipëria.

Vizitat e shumta në muze, sipas të dhënave zyrtare, dëshmojnë për një interes në rritje të publikut vendas dhe të huaj për historinë, kulturën dhe identitetin kombëtar.

Muzeu i Krujës është i njohur si Muzeu Kombëtar “Gjergj Kastrioti Skënderbeu”. Në të janë të ekspozuara mjaft objekte, dokumente dhe bibliografi origjinale, riprodhime autentike që flasin qartë për historinë e popullit shqiptar në shek. XV e më gjerë. Në muze numërohen disa pavijone si, pavijoni i Antikitetit dhe Mesjetës së Hershme, pavijoni i Principatave Shqiptare, i Pushtimit Osman dhe përballimit të këtij pushtimi, pavijoni i kështjellave mesjetare, i qëndresës shqiptare, kancelaria e Skënderbeut, biblioteka, salla e princave, e pinakotekës dhe së fundi pavijoni i trashëgimisë dhe i jehonës.

Në këto pavijone janë ekspozuar objekte prej qeramike, bronzi, hekuri, bakri, faksimile të ndryshme, ikona origjinale, shkrime, kambana e vitit 1462, shpata origjinale të shekullit XV, etj.

Muzeu i Krujës, është një nga muzetë më të vizituar në Shqipëri.

Burimi ATSH