Ministria e Financave zhvilloi sot ankandin e obligacioneve 20-vjeçare, ku interesi i investitorëve rezultoi dukshëm mbi shumën e shpallur.

Ministri i Financave, Petrit Malaj bëri të ditur se kërkesa e paraqitur në ankand ishte 2,6 herë më e madhe krahasuar me shumën e shpallur, duke reflektuar interes të lartë për instrumentet afatgjata të borxhit publik.

Sipas tij, këto obligacione të emetuara nga qeveria shqiptare ofrojnë siguri dhe stabilitet për investitorët, duke i bërë një zgjedhje tërheqëse për investime afatgjata.

“Rezultati i ankandit është një tregues i qartë i besimit që tregu ka ndaj ekonomisë shqiptare dhe politikave të ndjekura për menaxhimin e financave publike”, u shpreh Malaj.

Ministria e Financave thekson se zgjerimi i maturiteteve të borxhit publik përmes instrumenteve afatgjata synon të përmirësojë profilin e borxhit, duke ulur rreziqet e rifinancimit dhe duke garantuar qëndrueshmëri më të madhe në menaxhimin e tij.

Obligacionet 20-vjeçare konsiderohen instrumente të rëndësishme për zhvillimin e tregut të kapitaleve në vend, pasi ofrojnë alternativa investimi për fondet e pensioneve, bankat dhe investitorë të tjerë institucionalë, të interesuar për kthime të qëndrueshme në afat të gjatë.

Ankandi i sotëm vlerësohet nga ekspertët si një sinjal pozitiv për tregun financiar vendas dhe për perspektivën e financimit afatgjatë të buxhetit të shtetit.

Burimi ATSH