“Mrekullitë e Arbërisë” rikthehen në skenën e Teatrit Kombëtar të Operës, Baletit dhe Ansamblit Popullor, të interpretuara nga Ansambli Kombëtar i Këngëve dhe Valleve Popullore, në bashkëpunim me ansamblin “Gurra e Kurbinit”.

Spektakli do të sjellë në skenë pasurinë dhe bukurinë e trashëgimisë sonë kulturore, ku tingujt epikë të lahutës, magjia e polifonisë, energjia e K’cimit të Tropojës, hijeshia e xhubletës, madhështia e qyteteve të gurit dhe tradita e lashtë e transhumancës ndërthuren në një rrëfim artistik kushtuar shpirtit të Arbërisë.

Në qendër të këtij udhëtimi muzikor vjen lahuta, një nga simbolet më të hershme të traditës sonë epike, instrumenti që ndër shekuj ka shoqëruar këngët e kreshnikëve dhe ka përcjellë brez pas brezi kujtesën, historinë dhe krenarinë e popullit shqiptar. Tingulli i saj i fuqishëm dhe i veçantë i jep spektaklit një dimension të thellë emocional, duke sjellë jehonën e maleve dhe të rrëfimeve të lashta shqiptare.

Një vend të rëndësishëm në spektakël do të ketë “Mjeshtri i Madh”, Vendim Kapaj me fyellin e tij, që u bë i famshëm edhe ndërkombëtarisht pas interpretimit në filmin “Odisea” të Kristofer Nolan dhe muzikë nga Ludvig Goranson. Kapaj është mjeshtri i këtij instrumenti tradicional, tingulli i të cilit sjell në skenë frymën e kullotave, maleve dhe jetës së hershme baritore. Në interpretimin e tij, fyelli bëhet një zë i natyrshëm i peizazhit shqiptar, i thjeshtë në tingull, por i pasur në emocion dhe kujtesë.

Spektatorët do të dëgjojnë dhe tingujt e lahutës së Pjetër Matushës, duke rikthyer në skenë jehonën e këngës epike shqiptare, së bashku me grupin e çiftelive, që i jep ngjyrë dhe ritëm traditës sonë muzikore.

Burimi ATSH