Mbi 50 studentë, profesionistë të IT-së, ekspertë dhe të apasionuar pas sigurisë kibernetike morën pjesë në garën “Capture the Flag” (CTF), zhvilluar në Këndin Amerikan në Tiranë.

Ambasada amerikane në Tiranë njoftoi se mbi 50 studentët u përballën me sfida praktike në sigurinë e faqeve të internetit, kriptografi, ekspertizë digjitale, rrjete kompjuterike dhe reagim ndaj incidenteve kibernetike.

Cyndi Waite dhe përfaqësues të tjerë të Ambasadës së SHBA-së përgëzuan pjesëmarrësit në hapje të garës.

“Ky aktivitet përmbylli programin “Lidershipi Amerikan në Sigurinë Kibernetike dhe Inteligjencën Artificiale për Shqipërinë”, të zbatuar nga AlphaPlan në Këndet Amerikane në Tiranë, Vlorë dhe Kukës”, njoftoi Ambasada amerikane.

Sipas Ambasadës amerikane, përmes këtij programi, Shtetet e Bashkuara vijojnë të mbështesin aftësitë e Shqipërisë për t’u përballur me kërcënimet kibernetike dhe për të ndërtuar së bashku një të ardhme digjitale më të sigurt.

Burimi ATSH