Gjirokastra vijon të tërheqë turistë nga vende të ndryshme të botës, të cilët e zgjedhin qytetin e gurtë për historinë, arkitekturën, peizazhin dhe gastronominë.

Kalaja e Gjirokastrës vijon të mbetet një nga destinacionet turistike më të vizituara, duke konfirmuar interesin në rritje të vizitorëve vendas e të huaj.

Zëvendëskryeministrja Albana Koçiu bëri të ditur sot se nga janari në gusht, 200 mijë vizitorë kanë zgjedhur të vizitojnë Kalanë e Gjirokastrës, për të zbuluar nga afër historinë, arkitekturën dhe trashëgiminë e një prej qyteteve më të veçanta të Shqipërisë.

Sipas zv/kryeministres, Kalaja e Gjirokastrës mbetet një magnet i vërtetë për turistët dhe një pasuri e çmuar e trashëgimisë sonë, që vazhdon të tërheqë gjithnjë e më shumë vizitorë nga e gjithë bota.

“Shqipëria Turistike, me një tjetër shifër që flet qartë për suksesin e saj. Bashkë, drejt rekordeve të reja”, tha Koçiu.

Kalaja e Gjirokastrës ndodhet e vendosur mbi një kodër pak të shkëputur nga Mali i Gjerë, e ngritur në një pikë vrojtuese rreth 370 m mbi nivelin e detit. Krahasuar me kalatë mesjetare të tjera të vendit, kjo kala është më e vogël nga sipërfaqja dhe ruhet në gjendje më të mirë. Gjerësia e saj është 75 m dhe gjatësia 500 m. Për t’u shtuar rezistencën mureve të kalasë janë ngritur pesë kulla të fuqishme.

Në hyrje gjendet galeria e topave dhe një koleksion i armëve që janë mbledhur që nga fillimet e përdorimit të tyre e deri në Luftën e Parë dhe të Dytë Botërore.

Marrë nga ATSH