Ministrja e Arsimit, Mirela Kumbaro bëri të ditur sot se ka përfunduar me sukses shpërndarja e 5478 paketave mësimore me të treja nivelet e teksteve të gjuhës shqipe dhe kulturës shqiptare falas, në 18 shtete të Diasporës.

“Falë një mirëkoordinimi dhe përkushtimi në organizimin e punës mes Qendrës së Botimeve për Diasporën dhe Ministrisë për Evropën dhe Punët e Jashtme u bë e mundur shpërndarja efikase në një pjesë të madhe të komuniteteve shqiptare në diasporë”, tha Kumbaro.

Sipas saj, kjo nismë vjen si mbështetje për të gjithë fëmijët që mësojnë shqipen, si dhe mësuesit që ruajnë dhe përcjellin vlerat e identitetit tonë kulturor e gjuhësor.

“Më shumë shtete të Diasporës, më shumë libra shqip, më shumë fëmijë të lidhur me rrënjët”, tha Kumbaro.

Burimi ATSH