Kryetari i Kuvendit, Niko Peleshi u takua me presidentin e parlamentit të Landit të Saksonisë-Anhalt në Gjermani, Gunnar Schellenberger, ku në fokus të bisedimeve ishte forcimi i bashkëpunimit parlamentar mes dy vendeve.

Gjatë takimit, palët diskutuan për zgjerimin e marrëdhënieve institucionale dhe nxitjen e bashkëpunimit në fusha me interes të përbashkët si ekonomia, arsimi, kultura dhe teknologjia.

Peleshi vlerësoi gjithashtu potencialin që ofrojnë qytete shqiptare si Korça për thellimin e bashkëpunimit me partnerët gjermanë, veçanërisht në fushat e arsimit, kulturës, inovacionit dhe lidhjeve mes institucioneve vendore dhe komuniteteve.

“Me Presidentin e Parlamentit të Landit të Saksonisë-Anhalt, Gunnar Schellenberger, mbi forcimin e bashkëpunimit parlamentar, mbështetjen e marrëdhënieve mes institucioneve dhe nxitjen e mundësive të reja për bashkëpunim në fushat e ekonomisë, arsimit, kulturës dhe teknologjisë.

Vlerësuam edhe potencialin që ofrojnë qytete si Korça për zgjerimin e bashkëpunimit mes Shqipërisë dhe Gjermanisë, veçanërisht përmes arsimit, kulturës, inovacionit dhe lidhjeve mes qeverisjes, institucioneve vendore dhe komuniteteve”, shkruan Peleshi.

Ai shprehu mirënjohjen për mbështetjen e vazhdueshme të Gjermanisë në procesin e integrimit europian të Shqipërisë.

“Mirënjohje për mbështetjen e vazhdueshme të Gjermanisë në rrugëtimin e Shqipërisë drejt Bashkimit Evropian, si edhe për kontributin e saj në avancimin e reformave demokratizuese dhe integruese. Bashkëpunimi intensiv me parlamentet e landeve, në vijim të partneritetit të shkëlqyer me Bundestagun, pasuron marrëdhëniet mes dy vendeve tona, afron institucionet, bizneset dhe qytetarët dhe krijon një bazë edhe më të fortë për partneritetin shqiptaro-gjerman”, shkruan Peleshi.

Burimi ATSH