Balerini i mirënjohur shqiptar Kledi Kadiu ndau sot lajmin se do të sjellë në Shqipëri edicionin e parë të International Ballet Competition Albania.

Ky aktivitet i rëndësishëm ndërkombëtar vjen si iniciativë e koreografit dhe balerinit Kledi Kadiu, i cili do të ketë mbështetjen e Shkollës Kombëtare të Baletit, Ministrisë së Turizmit, Kulturës dhe Sportit si dhe të Teatrit Kombëtar të Operas dhe Baletit.

Programi do të shtrihet në dy ditë: më 4 dhjetor do të zhvillohet një workshop pranë Shkollës Kombëtare të Baletit, ndërsa më 5 dhjetor do të mbahet konkursi në skenën e Teatrit Kombëtar të Operas dhe Baletit.

Projekti synon të kthehet në një pikë referimi për artin e kërcimit në rajon dhe më gjerë, duke mbledhur talente nga vende të ndryshme të botës dhe duke e vendosur Shqipërinë në hartën e aktiviteteve prestigjioze të baletit.

Juria dhe trupa e pedagogëve do të jetë e një niveli të lartë ndërkombëtar, me emra të njohur si Frédéric Olivieri, Paola Vismara dhe Michele Merola.

Kledi Kadiu tha se, kjo nismë përfaqëson fillimin e një projekti afatgjatë, me synimin për të krijuar një platformë të qëndrueshme për zhvillimin e talenteve të rinj dhe për shkëmbime artistike ndërkombëtare.

Burimi ATSH