Në kuadër të Samitit IV të Diasporës Shqiptare, në ambientet e Pallatit të Kongreseve u zhvillua këtë të mërkurë aktiviteti “Mëngjesi i Vëllazërimit”, një moment simbolik që bëri bashkë përfaqësues të komuniteteve fetare shqiptare nga vendi dhe diaspora.

Ministri për Evropën dhe Punët e Jashtme, Ferit Hoxha, theksoi në një postim në rrjetet sociale se “Mëngjesi i Vëllazërimit” vuri theksin tek rëndësia e bashkëjetesës dhe harmonisë fetare si një nga shtyllat kryesore të identitetit kombëtar shqiptar.

Hoxha u shpreh se bashkëjetesa, harmonia dhe respekti reciprok mes besimeve përbëjnë “hipotekën shpirtërore” të shqiptarëve, duke e cilësuar atë si një bazë të fortë dhe të qëndrueshme të shqiptarësisë.

Ai bëri të ditur se për herë të parë, në kuadër të Samitit IV të Diasporës, “Mëngjesi i Vëllazërimit” bëri bashkë përfaqësues të komuniteteve fetare nga brenda dhe jashtë vendit, nga Atdheu dhe Diaspora, në një lutje të përbashkët për Shqipërinë dhe për Flamurin.

Hoxha theksoi se, ky aktivitet përcolli një mesazh të përbashkët, të qartë dhe kumbues për paqe, harmoni dhe shpresë, që dëshmon se vlerat tona dhe trashëgimia jonë shpirtërore mbeten themeli i unitetit kombëtar.

Ai e cilësoi këtë moment unik bashkimi si një dëshmi e gjallë e vëllazërimit që e bën Shqipërinë, jo vetëm më të fortë, por edhe të veçantë.

Burimi ATSH