Ministri i Turizmit, Kulturës dhe Sportit Blendi Gonxhja, deklaroi se qeveria ka ndërmarrë një tjetër hap konkret për forcimin e financimit në fushën e artit, kulturës dhe sportit, përmes krijimit të mekanizmave të rinj mbështetës për projektet me interes publik.

Këshilli i Ministrave ka miratuar rregullat për ngritjen dhe funksionimin e Këshillit të Mbështetjes së Projekteve pranë Autoriteti i Mbikëqyrjes së Lojërave të Fatit, një strukturë e re që sipas ministrit Gonxhja, synon të financojë nisma krijuese, kulturore, sociale dhe sportive.

Gonxhja theksoi se ky mekanizëm përfaqëson një burim të ri financimi, jashtë tavaneve buxhetore, duke krijuar më shumë mundësi për zhvillimin e industrive kreative, turizmit dhe rritjen e angazhimit të rinisë. Ai e cilësoi këtë si një “dividend direkt” në mbështetje të projekteve me ndikim publik, që do të nxisin inovacionin dhe pjesëmarrjen aktive në jetën kulturore e sportive.

Ministri nënvizoi se kjo nismë vjen në vijim të reformave të ndërmarra, përfshirë rishikimin e ligjit për donacionet dhe sponsorizimet në art, kulturë dhe sport, si dhe krijimin e Fondit Kombëtar të Artit nga kursimet e tenderave.

Sipas ministrit Gonxhja, përmes këtyre instrumenteve të rinj synohet ndërtimi i një ekosistemi më të qëndrueshëm dhe transparent mbështetës, ku talenti dhe projektet me vlerë për komunitetin të kenë më shumë akses në financim dhe zhvillim.