Qendra Kombëtare e Kinematografisë dhe Agjencia Kombëtare të Rinisë zhvilluan sot aktivitetin me titull “Kthe pasionin në profesion”.

Ministri i Turizmit, Kulturës dhe Sportit, Blendi Gonxhja, i pranishëm në këtë aktivitet, tha se “Kthe Pasionin në Profesion” është përgjigjja e drejtpërdrejtë për këdo që ende dyshon te fuqia e industrive kreative në Shqipëri.

Sipas Gonxhes, ky sektor sot kontribuon rreth 3% të PBB-së dhe punëson mbi 21 mijë persona, me një potencial të jashtëzakonshëm për rritje ekonomike dhe punësim të të rinjve.

“Sot, në këtë event të organizuar së bashku me Qendrën Kombëtare të Kinematografisë dhe Agjencinë Kombëtare të Rinisë, kemi bashkuar të rinj, profesionistë dhe institucione për të krijuar mundësi konkrete zhvillimi, bashkëpunimi dhe punësimi në sektorin kreativ. Gjatë gjithë ditës do të vijojmë me trajnime praktike të orientuara drejt tregut të punës, masterclass me ekspertë të industrisë, panele diskutimi dhe prezantime projektesh kreative, ndërsa në mbrëmje aktiviteti kulmon me ceremoninë e çmimeve, ekspozitën artistike dhe networking”, tha Gonxhja.

“Kthe pasionin në profesion” është një platformë për fuqizimin e industrive kreative dhe të rinjve në Shqipëri me qëllim që të fuqizojë industrinë kreative në Shqipëri duke krijuar ura bashkëpunimi mes edukimit dhe tregut të punës, duke mbështetur dhe promovuar të rinjtë, si dhe nxitur inovacionin dhe sipërmarrjen përmes bashkëpunimit ndërinstitucional dhe dialogut mes aktorëve kryesorë të sektorit.

Burimi ATSH