Në një atmosferë të ngrohtë letrare dhe dialogu kulturor, në Athinë u promovua me sukses libri “Lindur së prapthi” – “Αναποδογεννημένη” i autores Rita Filipi, në ambientet e Black Duck.

Aktiviteti u organizua nga Ambasada e Republikës së Shqipërisë në Greqi, në bashkëpunim me shtëpitë botuese Bythebook dhe ALBAS.

Vepra, e përkthyer në greqisht nga Nikos Kacalidhas, sjell një qasje intime dhe reflektuese mbi identitetin, kujtesën dhe marrëdhëniet njerëzore. Mbrëmja u nderua me pjesëmarrjen e Udhëheqësit të Zyrës së Interesave të Kosovës në Greqi, z. Fitim Gllareva, Drejtueses së shtëpisë botuese “By the Book”, znj. Meri Thermioti, si dhe botuesve, artistëve, dashamirësve të letërsisë dhe përfaqësuesve të komunitetit kulturor shqiptar dhe grek.

Në fjalën e saj, ambasadorja Hajdaraga vlerësoi rëndësinë e promovimit të letërsisë shqipe jashtë vendit, si një urë që forcon dialogun kulturor dhe afron më shumë dy popujt.

Një nga momentet më të veçanta të mbrëmjes ishte interpretimi artistik i fragmenteve nga libri nga aktorja Algiona Aga dhe gazetarja Ira Londo, të cilat i dhanë veprës një dimension të gjallë dhe emocional.

Gjatë fjalës së saj, autorja Rita Petro ndau frymëzimin dhe emocionet që qëndrojnë pas veprës, duke e vënë theksin te shkrimi si akt çlirimi dhe vetë-njohjeje, në një bashkëbisedim të hapur me publikun.

Ky aktivitet u shndërrua në një urë të rëndësishme kulturore mes Shqipërisë dhe Greqisë, duke bashkuar diplomatë, artistë dhe lexues në një atmosferë dialogu dhe mirëkuptimi.