Samiti IV i Diasporës do të zhvillohet në Tiranë në datat 13, 14 dhe 15 prill, duke mbledhur shqiptarë nga e gjithë bota në platformë të përbashkët bashkëpunimi dhe dialogu.

Ministrja e Shtetit për Marrëdhëniet me Parlamentin, Erjona Ismaili, deklaroi se ky samit, nën sloganin “Nga rrënjët lartësohemi”, do t’i kushtohet tërësisht diasporës shqiptare, duke synuar forcimin e lidhjeve mes saj dhe institucioneve në vend.

Gjatë tre ditëve të aktivitetit, pjesëmarrësit do të kenë mundësi të diskutojnë dhe të shkëmbejnë ide me përfaqësues të lartë të qeverisë, kryetarë bashkish, drejtues institucionesh, si dhe personalitete të njohura nga fusha të ndryshme në Shqipëri.

Në fokus të diskutimeve do të jenë një sërë çështjesh me rëndësi për zhvillimin e vendit, përfshirë ekonominë, zhvillimin rural, gjuhën shqipe, komunikimin, artin, kulturën, shkencën, teknologjinë dhe inovacionin.

Sipas ministres Ismaili, samiti IV i Diasporës përbën një mundësi të rëndësishme për të rritur ndërveprimin dhe bashkëpunimin mes shtetit shqiptar dhe diasporës, duke krijuar ura të qëndrueshme bashkëpunimi për të ardhmen.

Ky samit synon të forcojë lidhjet me shqiptarët në mbarë botën dhe të kthejë idetë në veprime konkrete për zhvillimin e vendit.

Samiti do të ofrojë një program të detajuar me panele tematikë ku pjesëmarrësit mund të zgjedhin fusha të ndryshme interesi, duke përfshirë ekonomi, kulturë, art dhe teknologji.

Pjesëmarrësit mund të plotësojnë formularin online për të rezervuar vendin e tyre dhe për të zgjedhur panelet që i frymëzojnë më shumë.

Ky aktivitet është pjesë e përpjekjeve të Shqipërisë për të forcuar bashkëpunimin me diasporën dhe për të shfrytëzuar potencialin e saj për zhvillimin ekonomik, kulturor dhe social të vendit.

Burimi ATSH