Kryeministri Edi Rama deklaroi sot se qeveria po diskuton disa ndërhyrje të tjera të rëndësishme për pensionin duke përfshirë edhe fillimin e krijimit të një fondi të veçantë për pensionet për ata që duan ta kenë pensionin më të lartë.

Në takimin e asamblesë së Partisë Socialiste në Lezhë Rama tha se “shteti do të japë një kontribut të barabartë me kontributin që do japë personi dhe ai kontribut është aty dhe rritet deri kur personi del në pension, për shembull”.

“Po ku kemi pasur ne mundësi t’i bënim këto? E nëse e kemi sot, e kemi se rritet ekonomia”, tha Rama.

“Ne e kemi ditur që pensionet ishin pika më e dobët, hallka më e dobët e gjithë skeletit social të Shqipërisë dhe patjetër që, duke pasur edhe një mbështetje të madhe nga pensionistët, kemi qenë gjithmonë të vetëdijshëm që për pensionistët duhej bërë patjetër diçka, por s’kemi pasur mundësi ta bëjmë. Ekonomia nuk na e ka lejuar që ne ta marrim përsipër dhe ta bëjmë, por ama, nëse ia dolëm ta bëjmë dhe tani pensionet janë futur në rrugën e rritjes së përvitshme të parashikuara në buxhetet e mëtejshme, me dyfishim çdo janar”, nënvizoi Rama,

Rama u ndal edhe tek rritja e pagave në sektorin privat.

“Nuk është më në pyetje sa do ta paguaj atë që më duhet, por thjesht ku do ta gjej atë që më duhet për atë punë që më duhet”, tha Rama.

Marrë nga ATSH