Ministrja e Arsimit, Mirela Kumbaro njoftoi sot hapjen e një programi të ri masteri në qytetin e Gjirokastër, në bashkëpunim me Universitetin Kombëtar të Edukimit në Distancë të Spanjës (UNED).

Programi “Master në Studime të Bashkimit Europian” do të zhvillohet në kampusin e ri të UNED në Gjirokastër dhe synon të ofrojë mundësi të avancuara studimi për të rinjtë që duan të ndërtojnë një karrierë me dimension europian.

Kumbaro thekson se, janë në dispozicion 20 kuota, çka garanton një proces përzgjedhjeje konkurrues dhe cilësor.

Të gjitha lëndët do të zhvillohen nga profesorë të UNED, të specializuar në fusha si drejtësia, ekonomia dhe shkencat politike, ndërsa programi do të plotësohet edhe me leksione nga ekspertë të Bashkimit Europian.

Aplikimet për vitin akademik 2026–2027 janë të hapura dhe do të pranohen deri më 29 maj 2026. Procesi i aplikimit kryhet tërësisht online përmes platformës së universitetit.

Ky program është një hap i rëndësishëm në ndërkombëtarizimin e arsimit të lartë në Shqipëri dhe në rritjen e mundësive për studentët shqiptarë për të ndjekur programe europiane pa u larguar nga vendi.

Burimi ATSH