Në Fletoren Zyrtare, është botuar sot vendimi për krijimin e Bordit të Transparencës dhe Kufizimit të Përkohshëm të Çmimeve.

Agjencia për Media dhe Informim (MIA) bën me dije se ky vendim vjen për të garantuar kontroll, transparencë dhe mbrojtje të interesit publik në një sektor me ndikim të drejtpërdrejtë në ekonominë e vendit dhe jetën e qytetarëve.

Në vendim thuhet se është shpallur situatë së veçantë në tregun e hidrokarbureve, me propozimin e ministrit të Infrastrukturës dhe Energjisë dhe të ministrit të Ekonomisë dhe Inovacionit.

Këshilli i Ministrave vendosi “Për përpunimin, transportimin dhe tregtimin e naftës, të gazit dhe nënprodukteve të tyre”, të ndryshuar, nga data e hyrjes në fuqi të këtij vendimi deri në një vendimmarrje të dytë nga ana e Këshillit të Ministrave.

“Gjatë periudhës së situatës së veçantë ngrihet dhe funksionon Bordi i Transparencës dhe Kufizimit të Përkohshëm të Çmimeve të Tregtimit me Shumicë/Pakicë të Nënprodukteve të Naftës dhe Gazit”, thuhet në njoftim.

Sipas vendimit, subjektet detyrohen që brenda dates 24.3.2026, të njoftojnë pranë ministrit përgjegjës për ekonominë përfaqësuesit e tyre nëpërbërje të këtij bordi.

Në vendim, nënvizohet se “çmimet, që përcaktohen nga Bordi gjatë situatës së veçantë, janë të detyrueshme për të gjitha subjektet që ushtrojnë veprimtari në fushën e tregtimit të nënprodukteve të naftës dhe të gazit në vend, sipas përcaktimeve të legjislacionit në fuqi”.

Ngarkohen Ministria e Ekonomisë dhe Inovacionit, Ministria e Infrastrukturës dhe Energjisë, Ministria e Financave, Drejtoria e Përgjithshme e Tatimeve, Drejtoria e Përgjithshme e Doganave si dhe subjektet e licencuara për veprimtari me shumicë dhe pakicë në tregun e hidrokarbureve për zbatimin e këtij vendimi.

Ky vendim hyn në fuqi menjëherë dhe botohet në Fletoren Zyrtare.

Burimi ATSH
.