Kryeministri Edi Rama deklaroi sot në mbledhjen e zgjeruar të grupit parlamentar të Partisë Socialiste dhe të kabinetit qeveritar në Pallatin e Brigadave, se Shqipëria ka hyrë në një kapitull të ri të procesit të integrimit europian.

“Aktualisht kemi arritur hyrjen në kapitullin e ri të procesit, që është vlerësimi dhe më pas marrja e dritës jeshile për ato që quhen pikat e ndërmjetme. Sipas drejtuesve tanë në këtë proces, ky është një test me vështirësi shumë të lartë dhe kërkon një përgatitje shumë të madhe të vendit”, u shpreh Rama.

Ai nënvizoi se për vende të tjera para Shqipërisë janë dashur vite për të kaluar këtë fazë, ndërsa sipas planit të qeverisë shqiptare, testi duhet të përmbyllet brenda disa muajsh.

“Për planin tonë, ky test duhet kaluar në disa muaj dhe kjo do forcë. Dhe forcë, në këtë rast, do të thotë përqendrim i të gjitha forcave në një drejtim”, tha Kryeministri.

Rama u shpreh besimplotë se vendi do ta kalojë me sukses këtë fazë, pavarësisht, siç u shpreh ai, “shkopinjve nën rrota dhe tymit të bombave artizanale”.

“Nuk e kam fjalën thjesht për ato që plasin rrugëve të dëshpërimit të pangushëllueshëm opozitar, por për të gjitha ato bomba artizanale që plasin përditë, duke hedhur përpjetë kapakët e 700 tenxhereve mediatike, të cilat e kanë kthyer mexhelisin e Shqipërisë në pazarin më të neveritshëm të gënjeshtrave me lloj-lloj bishtash”, deklaroi ai.

Duke cituar një shprehje popullore, Rama tha se, “kur gënjeshtra ka bërë xhiron e botës, e vërteta s’ka veshur ende pantallonat”, duke shtuar se sot, ndryshe nga dikur kur “tenxherja e vetme mediatike ishte tellalli i qytetit”, lajmet dhe dezinformimi përhapen përmes çdo butoni.

Kreu i qeverisë theksoi se përballë kësaj situate, fokusi duhet të jetë i plotë te puna dhe vetëpërmirësimi.

“Duhet ta rrisim me çdo kusht përqendrimin në punët tona, të mëdha e të vogla. Të shtojmë forcat për t’i bërë sa më mirë dhe për t’i komunikuar sa më shumë, si edhe të përpiqemi me më shumë këmbëngulje të vetëkorrigjohemi dhe të vetëpërmirësohemi”, u shpreh ai.

Rama ftoi deputetët për debat të hapur brenda familjes politike, por me një objektiv të vetëm Shqipëria në Bashkimin Europian në vitin 2030.

“Pasi debatojmë dhe ndajmë opinionet, duhet të përqendrohemi në një pikë, në vetëm një pikë dhe asnjë tjetër, Shqipërinë në Bashkimin Europian në vitin 2030”, theksoi Kryeministri.

Në fund, ai e cilësoi integrimin në Bashkimin Europian si një moment historik për vendin.

“Shqipëria në BE nuk është një tjetër etapë e zhvillimit të vendit. Shqipëria në BE është histori”, theksoi Rama.

/Marrë nga ATSH