Ambasadori i delegacionit të Bashkimit Europian në Tiranë, Silvio Gonzato deklaroi sot se “organet drejtuese të gjyqësorit duhet të marrin më shumë përgjegjësi për efikasitetin e sistemit të drejtësisë dhe të koordinojnë më mirë veprimet mes tyre”.

Vetëm kështu, sipas tij, “qytetarët do të shohin përfitimet e reformës në drejtësi të vitit 2016”.

Gonzato mori pjesë sot në tryezën e rrumbullakët të organizuar nga Qendra për Studimin e Demokracisë dhe të Qeverisjes dhe ambasada holandeze, ku ishin të pranishëm drejtues të institucioneve të drejtësisë, shoqëria civile, ekspertë dhe partnerë ndërkombëtarë.

Ambasadori theksoi se “duke nxitur dialog të hapur dhe të vazhdueshëm me shoqërinë, institucionet e drejtësisë rrisin besimin e publikut në punën e tyre”.

Në takim u diskutua rreth përmirësimit të menaxhimit të sistemit gjyqësor, në përputhje me parimet e reformës në drejtësi.

Burimi ATSH