Katërmbëdhjetë shërbime të reja sociale u prezantuan sot nga Ministria e Shëndetësisë dhe Mirëqenies Sociale, në kuadër të eventit “Fondi Social 2026 – Garanci për Qëndrueshmërinë e Shërbimeve për Mirëqenien e Qytetarëve”, ku mori pjesë edhe Kryeministri Edi Rama.

Gjatë fjalës së tij, Rama theksoi rëndësinë e negociatave të anëtarësimit me Bashkimin Evropian, më shumë sesa vetëm “provime të kalueshme”, por si procese që ngrenë nivelin e cilësisë në çdo sektor që lidhet me standardet evropiane.

Kreu i qeverisë tha se negociatat nuk janë vetëm një fazë burokratike për t’u ulur në tryezën e BE-së, por janë momente që përcaktojnë transformimin e politikave dhe standardeve kombëtare drejt vlerave të BE-së, duke përfshirë mbështetjen sociale dhe mirëqenien që BE-ja ofron për shtetet anëtare.

“Ky është një rast tipik konkret për të kuptuar rëndësinë e negociatave të anëtarësimit, jo thjesht si provime që duhen kaluar për të arritur më në fund për t’u ulur ne tryezën e BE, por si momente që përcaktojnë rritjen e nivelit të cilësisë në çdo sektor ku ato momente prekin këtë ndërveprim me BE. Dhe sigurisht që BE është mekanizmi më i sofistikuar i mbështetjes dhe i mirëqenies sociale. Bashkimi evropian zotëron rrjetin më të avancuar të mbështetjes nga shteti, nga sektori publik i familjeve, i individëve, i kategorive shoqërore që janë vulnerabël”, tha Rama.

Gjatë vitit 2026, Fondi Social do të financojë 14 shërbime të reja, të dedikuara për fëmijët dhe nënat në nevojë, fëmijët dhe të rriturit me aftësi ndryshe, të moshuarit, gratë dhe vajzat viktima të dhunës, si dhe për fëmijët pa kujdes prindëror. Nga këto, 12 shërbime të reja do të ofrohen në bashkitë Durrës, Prrenjas, Kurbin, Skrapar, Himarë, Kavajë, Vorë, Korçë, Mat, Patos, Cërrik dhe Kamzë, ndërsa dy shërbime të reja Emergjence dhe Linje Këshillimi për fëmijë do të ngrihen në nivel qarku.

/Marrë nga ATSH