Ambasadori i Bashkimit Europian në Shqipëri, Silvio Gonzato zhvilloi një takim me kryetaren e komisionit parlamentar për Ekonominë, Punësimin dhe Financat, Milva Ekonomi, për të diskutuar për kontributin e Komisionit në procesin e integrimit europian të vendit.

Takimi u fokusua tek miratimi i legjislacionit të lidhur me Bashkimin Europian dhe monitorimi i zbatimit të tij, si element kyç për avancimin e reformave dhe standardeve europiane.

“Parlamenti ka një rol kyç në rrugëtimin e Shqipërisë drejt BE-së. Sot u takova me Milva Ekonomin, Kryetare e Komisionit Parlamentar për Ekonominë, Punësimin dhe Financat, për të diskutuar se si Komisioni mund të kontribuojë përmes miratimit të legjislacionit të lidhur me BE-në dhe monitorimin e zbatimit të tij”, theksoi Gonzato në një postim.

Ambasadori Gonzato theksoi gjithashtu rëndësinë e një procesi transparent dhe të bazuar në meritë për përzgjedhjen e pozicioneve vakante në Këshillin Mbikëqyrës të Bankës së Shqipërisë, duke theksuar rolin e tij thelbësor në ruajtjen e pavarësisë së institucionit dhe besimit të publikut.

“Diskutuam gjithashtu rëndësinë e një procesi përzgjedhjeje transparent dhe të bazuar në meritë për pozicionet vakante në Këshillin Mbikëqyrës të Bankës së Shqipërisë, i cili është thelbësor për ruajtjen e pavarësisë së Bankës dhe besimit të publikut”, u shpreh ambasadori i BE-së, Silvio Gonzato.

Burimi ATSH