Presidentja e Kosovës, Vjosa Osmani, nisi sot një vizitë pune në Emiratet e Bashkuara Arabe, ku do të marrë pjesë në Samitin Botëror të Qeverisjes.

Vizita, sipas njoftimit të zyrës së shtypit të Presidentes Osmani, realizohet me ftesë të Presidentit të Emirateve Arabe, Sheikh Mohamed bin Zayed Al Nahyan.

“Presidentja e Republikës së Kosovës, Vjosa Osmani, ka udhëtuar zyrtarisht në Emiratet e Bashkuara Arabe për të marrë pjesë në Samitin Botëror të Qeverisjes, me qëllim forcimin e bashkëpunimit ndërkombëtar dhe promovimin e vizionit të Kosovës për zhvillim dhe inovacion”, njofton zyra e shtypit.

“Në Samit do të marrin pjesë shumë liderë nga mbarë bota, me të cilët Presidentja do të ketë takime bilaterale për të diskutuar mundësi bashkëpunimi dhe projekte strategjike të përbashkëta”, lexohet në njoftim.

Gjatë vizitës, Presidentja Osmani do të marrë pjesë në sesione kyçe të Samitit, ku do të mbajë fjalime kryesore. Ajo gjithashtu do të marrë pjesë në sesione të ndryshme të forumit dhe tryeza tematike.

Samiti Botëror i Qeverisjes shërben si një platformë globale që bashkon liderë, organizata ndërkombëtare dhe kompani për të diskutuar të ardhmen e qeverisjes dhe bashkëpunimit ndërkombëtar.

Burimi ATSH