Deputeti i Partisë Socialiste, Erjon Malaj vlerësoi sot në Kuvend punën e SPAK-ut, duke theksuar se ky institucion ka shënuar një standard të ri në luftën kundër korrupsionit dhe krimit të organizuar.

Malaj u shpreh se SPAK ka treguar integritet, ka zhvilluar hetime proaktive dhe financiare, përdor teknologji moderne, trajnon specialistë dhe bashkëpunon me agjenci ndërkombëtare si Europol, Eurojust dhe OLAF.

“SPAK ka bërë një punë që meriton vlerësim. Ka treguar integritet, ka hapur hetime si asnjëherë më parë, dhe ka goditur në nivele që dikur askush nuk do të guxonte t’i prekte”, deklaroi Malaj.

Sipas tij, kjo ka rritur besimin e publikut dhe të partnerëve europianë.

“Ky është një standard i ri pune, dhe mbi të gjitha, është një standard që ka rritur besimin e publikut dhe të partnerëve tanë ndërkombëtarë. Ky fakt nuk është opinion, por është i reflektuar në raportet dhe vlerësimet e BE-së”, deklaroi ai.

Megjithatë, ai theksoi se institucionit i duhet të përmirësohet më tej në efikasitet dhe fokus tek çështjet me rëndësi të madhe, si edhe të forcojë kapacitetet në hetime financiare, krime kibernetike dhe krim të organizuar transnacional.

“Pas gati 6 viteve aktivitet, SPAK ka hyrë tashmë në një fazë të re, ku pritshmëritë janë më të larta: pritshmëri për më shumë profesionalizëm, për proces të rregullt ligjor, dhe për respektim strikt të standardeve të njohura, duke përfshirë vendimet unifikuese të Gjykatës së Lartë, jurisprudencën e Gjykatës Kushtetuese dhe të GJEDNJ”, u shpreh Malaj.

Deputeti socialist nënvizoi gjithashtu se politika duhet të mbështesë drejtësinë pa e përdorur atë për interesat e ditës, duke respektuar pavarësinë e saj.

Burimi ATSH