Ministrja e Punëve të Brendshme, Albana Koçiu, ndau sot në rrjetet sociale momente nga orët ndërgjegjësuese të programit “Policimi në komunitet”, i cili po zbatohet në shkollat 9-vjeçare në të gjithë vendin.

Koçiu tha se, “nën sloganin “Beteja e pafilluar është luftë e fituar”, ky program synon të rrisë ndërgjegjësimin tek të rinjtë për parandalimin e përdorimit të lëndëve narkotike, alkoolit dhe fenomeneve të tjera të dëmshme”.

Në kuadër të programit, oficerë policie zhvillojnë takime informuese me nxënësit, duke i pajisur ata me njohuri dhe vlera të rëndësishme për jetën.

Koçiu vlerësoi rolin kyç të oficerëve të sigurisë në shkolla, duke i cilësuar ata si faktorë të domosdoshëm për garantimin e një mjedisi të sigurt për fëmijët dhe të rinjtë.

“Aktualisht, mbi 60 oficerë policie janë të angazhuar në zbatimin e këtij programi, në kuadër të bashkëpunimit ndërinstitucional mes Ministrisë së Punëve të Brendshme dhe Ministrisë së Arsimit, me fokus te edukimi dhe parandalimi”, tha Koçiu.

Drejtori i Projektit Ansi Shundi u shpreh se, “për më shumë se 10 vite, asistojmë Policinë e Shtetit dhe Ministrinë e Brendshme. Janë rreth 61 punonjës të policisë që janë të angazhuar specifikisht vetëm me fushatat e ndërgjegjësimit në rreth 850 shkollat 9- vjeçare në rang vendi duke prekur rreth 120 mijë nxënës për rritjen e sigurisë në komunitetit”.

Ky model ndërveprimi pritet të forcojë më tej lidhjen mes komunitetit shkollor dhe strukturave të rendit, duke ndërtuar një kulturë besimi dhe sigurie që në moshë të hershme.

Burimi ATSH