“The Lines That Define Me” nga Norihiro Koizumi, ishte filmi që u shfaq në kuadër të Javës së Kulturës Japoneze në Tiranë.

Një histori prekëse që ndjek Sosuke, një të ri që, pas humbjes së familjes, gjen ngushëllim dhe vetëshprehje përmes artit tradicional sumi dhe pikturës me bojë kineze. Nën udhëheqjen e mjeshtrit Kozan Shinoda, ai mëson të shohë përtej dhimbjes dhe të zbulojë bukurinë e natyrës dhe jetës.

Filmi plot ndjeshmëri, reflektim dhe estetikë, mishëroi shpirtin e kinemasë japoneze, filmat e së cilës do të vazhdojnë të shfaqen në kinematë e kryeqytetit deri në datën 18 tetor, kur përfundon Java Kulturore Japoneze.

Cikli i filmave të përzgjedhur për t’u projektuar gjatë kësaj jave, të njeh me stilet dhe temat më të fundit të kinemasë japoneze moderne, e cila zhvillohet edhe përtej botës së animacionit.

Ditën e sotme tek Qendra e Artit “Agimi” do të shfaqet “Neko Ninja”, ndërsa në ditët në vazhdim: “Between Us” dhe “Takano Tofu”.

Burimi ATSH