Drejtori i Arkivit Qendror Shtetëror të Filmit, Eljan Tanini priti në një vizitë në Arkiv, piktorin e talentuar të kostumeve Ylli Beqiri, i cili dorëzoi në arkiv 151 skica origjinale të kostumeve të cilat do të plotësojnë koleksionin e skicave origjinale të filmave shqiptarë.

Beqiri është autor i qindra kostumeve të mrekullueshme të filmave si: “Balada e Kurbinit”, “Kohë e largët”, “Gurët e shtëpisë sime”, “Qortimet e vjeshtës”, “Historiani dhe kameleonët”, “Vdekja e kalit”, “Kronikë provinciale” e tjerë.

Tanini theksoi se, ky gjest i çmuar pasuron fondin e Arkivit Qendror Shtetëror të Filmit dhe ruan gjurmët e artit dhe trashëgimisë kulturore për brezat që vijnë.

Tanini nënvizoi se, Arkivi i Filmit prej kohësh ka hapur thirrjen për të arkivuar materiale origjinale me vlerë.

Ai shtoi se, Arkivi Qendror Shtetëror i Filmit i mirëpret me vlerësim të gjithë ata që zotërojnë materiale origjinale si, filma, skica, fotografi, dokumente apo objekte të tjera me vlerë historike e artistike, dhe i inkurajon t’i dorëzojnë në Arkiv, duke u bërë pjesë e misionit për të ruajtur dhe transmetuar kujtesën tonë kulturore.

Duke falënderuar artistin Ylli Beqiri, Tanini theksoi se ftesa vazhdon dhe të gjithë janë të mirëpritur për të dorëzuar në Arkivin Qendror Shtetëror të Filmit materiale me vlera të tilla.

Burimi ATSH