Ministri për Pushtetin Vendor, Ervin Demo u shpreh sot, se pushteti lokal është një aktor kryesor sa i takon përgjigjes së Emergjencave Civile në territor, ndaj bashkitë janë të parat që përballen me rreziqet e emergjencave.

Në aktivitetin ku të pranishëm ishin edhe Kryeministri Edi Rama, ministri i Mbrojtjes, Pirro Vengu, ministrja e Punëve të Brendshme, Albana Koçiu, ministri Demo tha se sfidat me të cilat përballen Emergjencat Civile gjatë sezonit veror, janë rritur.

“Ajo që konstatojmë në terren është nevoja për rritjen e kapaciteteve njerëzore dhe një ngritje dhe bashkim më i fortë i të gjitha niveleve që përgjigjen për Emergjencat Civile. Është normale që modernizimi dhe profesionalizimi i administratës shtetërore të shihet si diçka jetike për të garantuar një siguri publike më të gjerë për qytetarët në territor”, tha Demo.

Ministri Demo tha se janë disa nisma dhe zjarrëfikëset janë një ndër to, por edhe Policia Bashkiake për sa i përket sigurisë publike në këndvështrimin vendor.

“Dhe fokusi jonë në vazhdim do të jetë rritja e kapaciteteve në bashki, rritja e kapaciteteve logjistike, por edhe rritja e profesionalizmit. Akademia e Pushtetit Vendor është e fokusuar për rritjen e këtyre kapaciteteve dhe mbështetja financiare mbetet shumë e rëndësishme. Por, kjo duhet të bazohet mbi performancën dhe granti i performancës është i bazuar në tregues të qartë sa i përket rritjes dhe përmirësimit të kapaciteteve në territor”, tha Demo.

Ministri Demo, në fund të fjalës së tij u shpreh se nga viti 2026, rritja e kapaciteteve vendore do të jetë e ndjeshme, ndërsa futja e niveleve të reja të bashkërendimit mes Pushtetit Vendor dhe qendror do të jetë jetike sa i përket luftës ndaj emergjencave në territor.

/Burimi ATSH